你在這裡
首頁 > Travel > 大學生時代

大學生時代

呢個月已經係第二班機見到機上面出現大學生嘅遊學團。雖然唔講得上係長途機,但作為大學生,又有學校資助,我好支持有機會就衝出香港看一看,見識一下出面嘅世界。今日接載嘅學生來自香港本地嘅大學,中學要理科畢業,男性比例亦相對較高。今次我同一個crew partner出餐,由於外籍crew唔識講中文,所以全程都係用英文交談。當我partner去到呢兩個男仔嗰度嘅時候,問佢哋想食「omelette with sausage or chicken congee」,由於呢個長毛見到另一邊窗口位嘅朋友食緊蛋,就用中文同我partner講:我想食蛋。我partner聽唔明,用英文問多次。長毛依然用中文同佢講:我想食蛋。因為我partner聽唔明,所以就唔知比咩餐佢,雙方有啲尷尬,遙遠嘅我就同班大學生講: sorry my friend she doesn’t speak Chinese。之後長毛就直接對住遙遠嘅我講:我想食蛋。下一秒呢個男仔隔離嗰個四眼仔都即刻同我講:我想食蛋,呢行嘅男仔幾乎同一時間同我講佢想食蛋。我心諗一個大學生係唔係唔識得講蛋嘅英文呢?講英文?你係香港大學生黎架。想當年我嗰個年代,我大學放暑假唔係參加遊學團,我係去旅行社見暑期工做領隊去帶中學生出國遊學團。我對大學生係有期望,我對本港畢業嘅大學生係更高期望。我哋唔好衰比母語教學睇,我希望我哋大學畢業生依然有國際級嘅語文水平。

當我行前多一行,Serve完佢哋飲品之後,長毛竟然成個身唉埋去四眼仔度,遮住半邊咀同四眼仔講秘密,一時又用隻手指指下我,陰陰笑,一時又指下我partner,又遮住個嘴傾密計,講我同我partner個名唔知乜,又成個身挨埋去四眼仔度講嘢,兩個一齊望住我地笑,又一齊手指指。而我就仲企係隔離,隔離嘅意思係20 cm之內。當兩個男仔手指指,指住兩個女仔細聲講大聲笑,你會聯想啲咩呢?你係我走咗嘅時候講我我唔會知,但我就企左響你面前,我唔係螢幕,我係真人。我忍唔住問:你係唔係講緊我?呢個時候長毛笑笑咀咁問:「你點知嘅?你聽到我講嘢啊?我講得好大聲咩?」見到佢一念稚氣嘅牙齒同笑容,我選擇彎低腰,細細聲同佢講:「我其實聽唔到你講咩,但我就企係你隔離,見到你指住我,再同隔離個男仔遮住把口講兩句,兩個男仔一齊望住我笑,再一齊唔望我,再一齊指住我,再互相笑。其實咁樣好冇禮貌,你令到我覺得其喺度好尷尬。」兩個男仔知道我唔開心,同我講對唔住。然後長毛同四眼仔講:都係你衰啦。四眼仔就答:又關我事。兩個又笑。
我唔期望大家對空姐係神咁拜,但我希望我嘅生活係得到尊重,就算你係街上見到垃圾婆個頭髮亂左,你會唔會企係佢面前,指下佢個頭,擰轉面笑,又再回望佢,又再擰轉面笑。將心比己,假如你兄弟姊妹或者好朋友係做空姐,你希唔希望佢受到呢種待遇呢?而現實中,比比皆是。

留言
Top